Priten ditë më të mira për prodhuesit e vendit

Ministri i Bujqësisë, Blerand Stavileci ka theksuar se zhvillimi i sektorit të bujqësisë është vënë si prioritet në Qeverinë e Kosovës

Me ndarjen e mirënjohjeve për kompanitë pjesëmarrëse, është përmbyllur panairi katër ditor i Produkteve Bujqësore i organizuar nga Oda Ekonomike e Kosovës dhe Ministria e Bujqësisë, Pylltarisë dhe Zhvillimit Rural në të cilin morën pjesë rreth 60 kompani vendore dhe nga Shqipëria.

Ministri i Bujqësisë Pylltarisë dhe Zhvillimit Rural, Blerand Stavileci ka theksuar se zhvillimi i sektorit të bujqësisë është vënë si prioritet në Qeverinë e Kosovës dhe se për këtë ministria që ai drejton do të formojë një agjenci të pagesave për mbajtjen e sa më shumë panaireve të tilla të produkteve bujqësore.

Ndërkaq kryetari i Odës Ekonomike të Kosovës, Safet Gërgjaliu, ka thënë se më në fund po vijnë ditët ku vlera e produkteve vendëse do ta shohë dritën.

Njëri ndër pjesëmarrësit e panairit, u shpreh i lumtur për plasimin e produkteve të tij në tregun kosovar.

Ai shprehu dëshirën që të bashkëpunojë me përfaqësuesit e biznesit në Kosovë.

Ky panair sipas të pranishmëve dëshmoi se puna dhe mundi i fermerëve dhe biznesmenëve kosovarë po vlerësohet.