Shtëpia e lindjes së Rugovës futet nën mbrojtje të shtetit

Shtëpia ku ka lindur ish- presidenti Ibrahim Rugova, në Cërcë të Istogut, do të konsiderohet monument arkitektonik nën mbrojtje të shtetit.

Me të përmbyllet lista prej 930 monumenteve të trashëgimisë kulturore, të cilat kanë hyrë nën mbrojtje të përkohshme, raporton “Koha Ditore”.

Para saj është edhe kompleksi i shtëpive të Jasharajve në Prekaz të Skenderajt.

I pari i Kulturës në vend, Memli Krasniqi, ka vënë firmën e tij në këtë listë, që përmban, përveç këtyre, edhe shumë kulla, konakë, shtëpi banimi, xhami, kisha, tyrbe, teqe, e lokalitete arkeologjike.

Ministrisë së Kulturës i janë dashur 10 vjet që të përfundojë fazën fillestare të identifikimit të monumenteve të cilat do t’i futë nën mbrojtje të përhershme. Lista e përkohshme, një kopje të së cilës e ka siguruar “Koha Ditore”, është hapi i parë në këtë drejtim.