Kosova e Austria thellojnë bashkëpunimin në sektorin e bujqësisë

Marrëveshja ka për fokus avancimet në menaxhimin e tokave, resurseve ujore, çështjeve bujqësore-mjedisore, zhvillimit rural　

Ministri i Bujqësisë, Pylltarisë dhe Zhvillimit Rural i Kosovës, Blerand Stavileci dhe homologu i tij austriak, Nikolaus Berlakovich, kanë nënshkruar në Vjenë një memorandum mirëkuptimi për të thelluar bashkëpunimin në fushën e bujqësisë, pylltarisë dhe në industrinë e përpunimit të ushqimit.

“Me këtë rast u përmend roli i rëndësishëm që këta sektorë kanë në ekonomitë e të dy shteteve dhe u tha se bashkëpunimi i mëtutjeshëm do të përfshijë edhe projekte të përbashkëta bujqësore, me fokus të veçantë në avancimin e prodhimtarisë, në përpunimin dhe tregtimin e qumështit dhe pemëve e perimeve, në përgatitjen e pilot-projekteve të integruara për organizimin dhe menaxhimin e ndërmarrjeve bujqësore nëpërmjet trajnimeve dhe konsulencës”, thuhet në kumtesën e MBPZHR-së.

Sipas kumtëesës, kjo marrëveshje për fokus ka edhe avancimet në fushën e menaxhimit të tokave, menaxhimit të resurseve ujore, çështjeve bujqësore-mjedisore, zhvillimit rural.

“Të gjitha pikat e bashkëpunimit që dalin nga kjo marrëveshje parashihen të realizohen nëpërmjet këmbimit të përvojave, informatave dhe ekspertëve në fushën e bujqësisë, pylltarisë dhe degëve industriale të ndërlidhura me to, siç janë prodhimi, përpunimi dhe tregtimi i mallrave bujqësore dhe menaxhimi i pyjeve:, thuhet në kumtesë.

Republika e Austrisë për të rritur kontributin e sektorit të bujqësisë kosovare në zhvillimin ekonomik, deri tash ka dhënë kontribut të konsiderueshëm edhe nëpërmjet projektit të binjakëzimit të financuar nga Komisioni Evropian, i cili është duke u implementuar nga Ministria e Bujqësisë dhe Agjencioni i Pagesave i Republikës së Austrisë.

“Ky memorandum i nënshkruar nuk përbën një traktat ndërkombëtar dhe nuk do të krijojë të drejta dhe obligime për palët nënshkruese të cilat i nënshtrohen të drejtës ndërkombëtare. Kohëzgjatja e tij është e pakufizuar”, thuhet në kumtesën e Ministrisë së Bujqësisë, Pylltarisë dhe Zhvillimit Rural.