FMN-ja nuk pajtohet me tabelat për 2012

Shpenzimet e larta në disa sektorë karshi të hyrave më të vogla financiare kanë ndikuar në mospranimin nga FMN-ja

Ekipi i ekspertëve të Fondit Monetar Ndërkombëtar, i cili ka përfunduar inspektimet buxhetore, nuk ia ka dhënë dritën jeshile Qeverisë së Kosovës që t’i procedojë më tej tabelat e buxhetit për 2012-n.

Janë shpenzimet e larta në disa sektorë karshi të hyrave më të vogla financiare ato që kanë ndikuar në mospranimin nga FMN-ja të dokumentit me tabelat financiare të hartuara nga Qeveria, shkruajn mediat kosovare.

Në bazë të qarkores së dytë buxhetore, Qeveria për 2012-n ka paraparë deficit financiar prej afro 200 milionë eurosh, gjë që ka rezultuar me mospranim nga FMN-ja. Sipas të njëjtit dokument, shpenzimet e përgjithshme për vitin 2012 pritet të jenë në vlerën prej 1 miliard e 500 milionë eurosh, derisa të hyrat pritet të jenë më të vogla se 1 miliard e 300 milionë euro, raporton Koha Ditore.

$Ndonëse në Qeveri kanë paraparë që deri në gjysmën e muajit tetor të përfundojë hartimi i buxhetit për vitin e ardhshëm, javën e ardhshme Uashingtonin pritet ta vizitojnë krerët e politikave financiare të vendit.

“Marrëveshje të plotë me FMN-në për momentin nuk kemi, sepse bisedimet me FMN-në do të vazhdojnë edhe javën e ardhshme, ku një delegacion nga Ministria e Financave, i kryesuar nga ministri Bedri Hamza, do të udhëtojë për në Ëashington, ku edhe do të diskutohet për buxhetin 2012”, ka thënë, Muharrem Shahini, zëdhënës i Ministrisë së Financave.