Letërkëmbim i ashpër i Memlit me Christophe Solioz

Solioz: Me shkarkimin e Nezirajt, Kosova po dërgon një sinjal të gabuar në botë. Krasniqi: Jeni i manipuluar.

Me rastin e shkarkimit të Jeton Nezirajt nga posti i drejtorit artistik të teatrit Kombëtar të Kosovës,  kishte reaguar Qendra për strategjitë e integrimit evropian (CEIS) me seli në Gjenevë, përmes kryetarit të saj, Christophe Solioz.

Në letrën e tij dërguar ministrit kosovar të kulturës, Memli Krasniqit, Solioz pasi ka radhitur disa emra të artistëve shqiptarë të cilët CEIS i ka pëlqyer në rrugën e tyre të suksesit në botë, si Anri Sala, Adrian Paci, Erzen Shkololli, Beqë Cufaj dhe vetë Jeton Neziraj, ka kritikuar shkarkimin e këtij të fundit. Ai ka tërhequr vërejtjen se, duke e shkarkuar nga posti një drejtor të suksesshëm artistik dhe një krijues me reputacion ndërkombëtar si Jeton Neziraj, Kosova dhe qeveria e saj po i dërgonte botës një sinjal të gabuar.

Ndërsa në letrën e tij të kthimit, ministri i kulturës Memli Krasniqi i shkruan drejtorit të CEI-s se informatat që ka marrë nbag Neziraj janë të pavërteta dhe kanë të bëjnë me një fushatë kundër ministrit dhe kulturës së vendit. Krasniqi ia sqaron z. Solioz se Neziraj, sipas tij, nuk është shkarkuar por atij i ka kaluar mandati 3 vjeçar dhe në këto raste sigurisht që shpallet konkursi për zgjedhjen e drejtorit të ri artistik. Në këtë konkurs ka pasur të drejtë të marrë pjesë edhe vetë ish drejtori artistik, Jeton Neziraj, ka shkruar Krasniqi.

Ai pastaj ka përgënjeshtruar thënien e Nezirajt sipas të cilit bordi përzgjedhës i teatrit përbëhet nga njerëz jo profesionistë dhe me orientim të caktuar politik. Në këtë bord janë emrat si Jusuf Buxhovi, Shkumbin Istrefi, Zymber Kelmendi, Emin Halili, Ilire Vinca, Igballe Qena e Ahmet Brahimaj, të gjithë emra të respektuar dhe profesionistë në lëmenjtë përkatës, ka shkruar ministri Krasniqi.

Memli Krasniqi ka kundërshtuar po ashtu kualifikimin nga ana e Nezirajt për tendencën që, pas shkarkimit të tij, teatri të bëhet strehë e “nacionalizmit primitiv dhe racist”. Ai është shprehur edhe kundër kualifikimit nga ana e Nezirajt për drejtorin e ri artistik të posazgjedhur Emin Emini si njeri jo profesionist dhe i ardhur nga politika.

Në fund, ministri Memli Krasniqi e lut z. Solioz që të marrë edhe opinionet e njerëzve tjerë të paanshëm të artit në Kosovë, para se të bëjë tablonë e vërtetë për gjendjen e kulturës në Kosovë.