Pahor i siguroi Thaçit mbështetjen e Sllovenisë

Pahor: perspektiva e Kosovës është e qartë, evropiane dhe në këtë proces të rëndësishëm Sllovenia do të jetë mbështetësja e Kosovës

Kryeministri i Kosovës, Hashim Thaçi, është takuar sot në Lubjanë me kryeministrin e Sllovenisë, Borut Pahor. Në këtë takim dy kryeministrat kanë diskutuar për forcimin e bashkëpunimit në mes dy vendeve mike, për mbështetjen sllovene për perspektivën evropiane të Kosovës dhe për temat tjera me interes.

Thaçi i ka shprehur mirënjohjen kryeministrit Pahor për mbështetjen që Sllovenia i ka dhënë avancimit të proceseve demokratike dhe zhvillimit në Kosovë. Sipas tij, bashkëpunimi mes Kosovës dhe Sllovenisë është modeli më i mirë i bashkëpunimit të suksesshëm të vendeve të rajonit, thuhet në një kumtesë nga kryeminstria e Kosovës.

Kryeministri i Kosovës ka theksuar rëndësinë e mbështetjes sllovene për qeverinë kosovare lidhur me procesin e integrimeve evropiane, e posaçërisht për procesin e liberalizimit të vizave për qytetarët e Kosovës. Kryeministri Thaçi ka marrë mbështetjen e homologut të tij se Sllovenia do të vazhdojë të jetë mbështetëse e Kosovës për procesin e liberalizimit të vizave.

Kryeministri i Sllovenisë, Borut Pahor, ka vlerësuar lartë bashkëpunimin mes qeverive të dy vendeve dhe ka shprehur bindjen se ky proces i bashkëpunimit do të avancohet në të gjitha fushat, me theks të veçantë në fushën e zhvillimit ekonomik. Ai theksoi se perspektiva e Kosovës është e qartë, ajo është perspektiva evropiane dhe në këtë proces të rëndësishëm Sllovenia do të jetë mbështetësja e Kosovës, përfundon kumtesa nga zyra e kryeministrit të Kosovës. .