25 milionë euro për mos ndotjen e ajrit

Pas ndërrimit të elektrofiltrave TC “Kosova A” do të ketë emetim në përputhje të plotë me nivelin që e lejon Bashkimi Evropian

Korporata Energjetike e Kosovës, ka përqendruar vëmendjen edhe në elektro-filtra të cilat aktualisht janë të instaluar në tri blloqet operuese të TC Kosova A, në A3, A4 dhe A5, të cilët janë të vjetër, joefikas dhe të cilët lirojnë sasi të mëdha të pluhurit, gjë që shkakton ndotjen jo vetëm të zonave përreth mirëpo edhe brenda objekteve të kazanit.

Sipas zyrtarëve të KEK-ut, në bazë të analizave u bë e qartë se nivelet e emetimit të pluhurit të termocentralit mund të zvogëlohen ekonomikisht në nën 50 mg/Nm³.

Pas ndërrimit të elektrofiltrave TC “Kosova A” do të ketë emetim në përputhje të plotë me nivelin që e lejon Bashkimi Evropian.

Procesi i prokurimit tash ka përfunduar dhe dy kontrata i janë dhënë një konzorciumi që përbëhet prej: Hamone Environmental nga Gjermania, i cili është pjesë e grupit më të madh “Hamon”, dhe i cili është i njohur ndërkombëtarisht në fushën e sistemeve për kontrollimin e ndotjes së ajrit, dhe Intering L.L.C, një kompani Kosovaro-Gjermane, e cila ka traditë të gjatë të punës me termocentrale të të njëjtit lloj dhe cilësi si: TC Kosova A.

“Kostoja totale për zëvendësimin e të tri EF-ve është rreth 25 milionë euro. Kjo po financohet nga fondet e KEK-ut. Korporata nuk ka mundësi që t’i largojë nga operimi të tri këto blloqe në të njëjtën kohë, në mënyrë që të zëvendësojë elektofiltrat e tyre.

Prandaj, punët do të zgjaten edhe për dy vitet e ardhshme me dy elektrofiltra që do të zëvendësohen në vitin 2012, dhe EF-ja i fundit në vitin 2013″.

Përpjekjet e KEK-ut për të zvogëluar emetimin e pluhurit të TC Kosova A janë pjesë e përpjekjeve të mëdha në minimizimin e ndikimit të TC Kosova A, në mjedise të cilat përfshijnë projektin në vazhdim e sipër për instalimin e një sistemi hidraulik për largim të zgurës nga TC Kosova A, një projekt ky që po bashkë-financohet nga Banka Botërore dhe Qeveria holandeze.

Projekti për Pastrim dhe Rikultivim të tokave i financuar nga Banka Botërore dhe Qeveria Holandeze është duke u implementuar nga KEK-u dhe përfshin sistemin e ri të propozuar të transportimit hidraulik, të njomë të hirit nga Kosova A në minierën e Mirashit.

Ky projekt duhet të përfundojë në fillim të vitit 2012. KEK-u kontribuon me 8 milionë euro për këtë projekt.