Sadiku i hapur për rikthimin në Lugano

Armando Sadiku nuk dëshiron të jetë pjesë e Zurichut dhe nuk ka përjashtuar mundësinë që të rikthehet te Lugano

Sulmuesi i Kombëtares shqiptare, Armando Sadiku nuk e ka përjashtuar mundësinë që të luajë në Lugano, ku trajner është emëruar Paolo Tramezzani, ish-ndihmëstrajner i Shqipërisë, shkruan albinfo.ch.

“E di që palët janë duke negociuar, agjenti im po merret me këtë situatë dhe të shohim se si do të shkojnë gjërat. Në këtë moment preferoj të mos flas dhe të pres se çfarë drejtimi do të marrë kjo situatë”, është shprehur sulmuesi për mediat zvicerane.

Sadiku edhe më herët ka qenë pjesë e Luganos dhe pikërisht nga kjo skuadër kaloi në Zurich, ku luan tani, por në Ligën e Parë zvicerane.

“Sigurisht, e njoh mirë Luganon dhe gjithçka rrethon skuadrën dhe klubin. Gjatë periudhës që mbaja fanellën bardhezi jam ndier mirë edhe pse më vjen keq që nuk arritëm të ngjiteshim në Superligë. Tani konteksti ka ndryshuar duke qenë se skuadra po lufton për mbijetesën në kategorinë elitare. Për sa i përket Tramezzanit, nuk mund të flas veçse mirë”, theksoi sulmuesi shqiptar.