Francezët të shqetësuar për numrin e madh të azilkërkuesve shqiptarë

Nga 293 kërkesa të përmuajshme azili që shqiptarët kërkonin zakonisht në Francë, kjo shifër është trefishuar muajt e fundit, duke mbërritur në 973

Numri i azilkërkuesve shqiptarë është i lartë në Gjermani e Zvicër, por së fundi edhe Franca është shndërruar në destinacion shumë i rëndësishëm për shqiptarët.

Por, e përditshmja franceze “Le Monde” është e shqetësuar për numrin e madh të azilkërkuesve nga Shqipëria në Francë, raporton albinfo.ch.

Me titullin e fortë: “Shqetësim për shtimin e kërkesave për azil të shqiptarëve” gazeta vë re se shqiptarët renditen para sirianëve apo afganëve, qytetarë që vijnë nga zonat e konfliktit.

Megjithëse, Franca nuk është një tokë e preferuar për shqiptarët, plot 5 700 kanë kërkuar mbrojtje në këtë vend. Nga 293 kërkesa të përmuajshme azili që shqiptarët kërkonin zakonisht në Francë, kjo shifër është trefishuar muajt e fundit, duke mbërritur në 973.

Pjesa më shqetësuese e artikullit të “Le Monde” është një letër që gazeta ka arritur të sigurojë. Ajo mban firmën e ambasadorit të Francës në Tiranë Bernard Fitoussi dhe i drejtohet Ministrisë së Brendshme. Aty shprehet shqetësimi për rritjen e kërkesave të azilit nga shqiptarët dhe lëshohet alarmi: “Kjo situatë mund të rëndohet”.