Mjekët e rinj në Zvicër alarmojnë për mungesë të mjekëve familjarë

(KEYSTONE/Christian Beutler)

Mjekët e rinj familjarë në Zvicër po përballen me ngarkesë të lartë pune, ndërsa vendi rrezikon të përballet me mungesë të mjekëve në kujdesin parësor.

Një studim i Universitetit të Bernës dhe Shoqatës Zvicerane të Mjekëve të Rinj të Familjes (JHaS) tregon se të gjithë mjekët e rinj të anketuar deklarojnë se kanë shumë pacientë, duke bërë që një pjesë e tyre të mos pranojnë më pacientë të rinj.

Situata është veçanërisht shqetësuese për të ardhmen e kujdesit parësor. Përfaqësuesit e mjekëve të rinj kërkojnë nga autoritetet ndryshime në kushtet e punës, më pak barrë administrative dhe mundësi më të mira për të kombinuar profesionin me jetën familjare.

Sipas studimit, mjekët e rinj preferojnë më shumë të punojnë në zona periferike dhe rurale sesa në qendrat e qyteteve. Rreth 48 për qind preferojnë periferitë, 36 për qind zonat rurale dhe vetëm 16 për qind qendrat urbane.

Një tjetër ndryshim i rëndësishëm është preferenca për punën në ekipe. Vetëm 3 për qind e mjekëve të rinj dëshirojnë të punojnë në praktika individuale, ndërsa shumica preferojnë ordinanca me disa kolegë.

JHaS kërkon gjithashtu forcimin e bashkëpunimit ndërmjet mjekëve, asistentëve mjekësorë dhe infermierëve të specializuar, në mënyrë që ngarkesa e punës të shpërndahet më mirë.

Shoqata kërkon edhe financim dhe kompensim më të përshtatshëm për mjekësinë familjare. Sipas saj, kujdesi ambulator parësor trajton rreth 94 për qind të problemeve shëndetësore, ndërsa përbën vetëm rreth 8 për qind të kostove të kujdesit shëndetësor.

Mjekët e rinj paralajmërojnë se pa ndryshime të menjëhershme, sistemi shëndetësor zviceran mund ta ketë gjithnjë e më të vështirë të sigurojë numrin e nevojshëm të mjekëve të familjes në të ardhmen.