Të huajt, më “patriotë zviceranë” se vetë zviceranët

90% të frankofonëve dhe 79 % të gjarmanofonëve kanë pohuar se 1 gushti është një ditë me rëndësi për ta

Një anketë e realizuar në prag të festës kombëtare të Zvicrës, 1 gushtit, është marrë me përcaktimin e shkallës së patriotizmit të zviceranëve po edhe të të huajve që jetojnë në Zvicër.

Sondazhin e ka kryer instituti për hulumtimin e opinionit Demoscope dhe në të kanë marrë pjesë 500 veta nga të gjitha rajonet e Zvicrës, shkruan 20minuten.ch.

Interesante në këtë sondazh është se të huajt kanë rezultuar më “patriotë zviceranë” sesa vetë zviceranët. Po ashtu, ndryshe nga sa perceptohet, zviceranët frankofonë dalin më të frymëzuar me patriotizëm se sa ata gjermanofonë.

Përderisa 90 për qind të frankofonëve (Zvicra romande) kanë pohuar se 1 gushti është një ditë me rëndësi për ta, kanë qenë vetëm 79 % të zviceranëve gjarmanishtfolës që kanë pohuar të njëjtën.

Njëra nga pyetjet e sondazhit që u është drejtuar pjesëmarrësve ka qenë nëse ata do të marrin pjesë në ndonjë manifestim kushtuar 1 gushtit.

31 për qind të zviceranëve të Romandisë janë përgjigjur me po, ndërkohë që në mesin e gjermanofonëve kanë qenë 21 për qind të mendimit të njëjtë.