Kërkohet që EULEX-i të mbështesë masat e reciprocitetit

Moszbatimi i vendimin për masat e reciprocitetit nga EULEX-i në të gjitha pikat doganore të vendit e bën gjysmak dhe jo fuqiplotë, është thënë në takimin e organizuar nga Aleanca Kosovare e Biznesit me biznese të ndryshme të Kosovës dhe me ministren e Tregtisë dhe Industrisë, Mimoza Kusari Lila.

Çështja e masës së reciprocitetit që ka vënë Qeveria e Kosovës ndaj mallrave të Serbisë nuk po zbatohet nga EULEX-i. Sipas kësaj ky vendim del të jetë i vlefshëm vetëm për dy pika doganore, përderisa e njëjta nuk do të vlejë edhe më tej për pikat kufitare të veriut 1 dhe 31.

Agim Shahini, kryetar i Agjencisë Kosovare të Biznesit, ka deklaruar se moszbatimi i ligjit nga ana e EULEX-it në të gjitha pikat doganore të vendit vendimin për masat e reciprocitetit e bën gjysmak dhe jo fuqiplotë.

Ndërsa, ministrja e Industrisë dhe Tregtisë Mimoza Kusari Lila ka theksuar se volumi i tregtimit në pikat kufitare 1 dhe 31 në veri, në ditën e dytë pas hyrjes në fuqi të vendimit, është përgjysmuar.

Gjithashtu, ministrja Kusari-Lila ka thënë se vendimi për masat e reciprocitetit nuk ka për qëllim ndarje etnike, por ka vetëm karakter ekonomik dhe nuk ekziston asnjë ide që Kosova të ndahet në dy zona doganore.

Qeveria e Kosovës më 20 korrik ka marrë vendim për masa reciprociteti të plotë për produktet e Serbisë, ndërsa për Bosnjë e Hercegovinën taksë doganore prej 10 për qind.

Vendimi është bazuar në faktin se kanë dështuar arritjet e marrëveshjeve për njohjen e vulave doganore të Kosovës dhe për këmbimin e lirë të mallrave, në procesin e dialogut me Serbinë, në Bruksel.

EULEX ka njoftuar se kjo çështje ka komplikuar gjërat dhe vendimi i qeverisë është duke u diskutuar.

Serbia dhe Bosnjë e Hercegovina janë shtetet, të cilat që nga viti 2008 kanë bllokuar produktet kosovare, në kuadër të marrëveshjes për tregtinë e lirë CEFTA