Regli:”Nje atentat si i Oslos mund të ndodhte edhe në Zvicër!”

"Shteti, i pafuqishëm të mbikëqyrë propagandën e qarqeve ekstremiste në internet", ka thënë shefi i Shërbimit Informativ të Zvicrës

Atentati i tmerrshëm që ndodhi të premten në Norvegji, mund të ndodhë edhe në Zvicër, ka thënë Peter Regli, shef i Shërbimit Informativ të Zvicrës.

Regli, duke folur në një intervistë për emisionin tagesschau të televizionit publik zviceran këtë mundësi e ka mbështetur në pafuqinë e shtetit për të vënë nën mbikëqyrje të gjitha nyjet e internetit që përhapin ideologji ekstremiste në gjithë vendin. Këtë ai e ka thënë duke iu referuar faktit se atentatori i Oslos, i kishte bërë me kohë të njohura synimet e tij edhe në internet.

Kështu, shefi i shërbimit informativ të Zvicrës ka thënë se aq i gjerë është rrjeti i internetit sa që “të kërkosh të vendosësh mbikëqyrjen mbi të, është sikur të kërkosh gjilpërën në një grumbull kashte.”

Prandaj, sipas Reglit, për të luftuar ekstremizmin në mënyrë efikase duhen domosdoshmërisht më shumë mjete për Shërbimin Informativ të Zvicrës.