Makolli komunave: më efikasë në qasje me mërgimtarët

Ministri porosit që në rastet e procedurave të përshpejtuara për pajisje me pasaportë, për mërgimtarët të pezullohet pagesa prej 100 euro.

Me rastin e shtimit të fluksit të ardhjes së mërgimtarëve tanë në Kosovë, Ministria e Diasporës e Republikës së Kosovës, u bën edhe njëherë thirrje administratave të Kuvendeve Komunale, si dhe Ministrisë së Punëve të Brendshme, që të shtojnë kapacitetet e tyre njerëzore dhe të zgjasin orarin e punës në zyrat e dokumenteve personale.

Ministria e Diasporës beson se, autoritetet lokale dhe ato qendrore do ta kenë parasysh kohën jo të gjatë të qëndrimit të mërgimtarëve tanë në Kosovës dhe vonesat eventuale gjatë procedurave në nxjerrjen e dokumenteve, mund t’u shkaktojë atyre vështirësi në vendet ku jetojnë.

Kjo ministri vlerëson se pritjet e mërgimtarëve për t’u pajisur me dokument personal nuk mund të arsyetohen tash kur vite me radhë kjo çështje ka kërkuar një zgjidhje emergjente.

Ajo po ashtu kërkon që në rastet e procedurave të përshpejtuara për pajisje me pasaportë, për mërgimtarët të pezullohet pagesa prej 100 euro.

Ministria e Diasporës thotë se ka marrë premtime nga Ministria e Punëve të Brendshme dhe nga kryetarët e Kuvendeve Komunale se do të angazhohen në krijimin e lehtësirave dhe përshpejtimin e procedurave për pajisjen e bashkatdhetarëve tanë me dokumentacion të nevojshëm, thuhet ndër të tjera në deklaratën e  nënshkruar nga ministri Ibrahim Makolli.