Pështyn policët, e paguan me dhjetë muaj burg dhe 5400 franga gjobë

Shqiptari 25 vjeçar duhet të paguajë 180 njësi nga 30 franga dhe të mbajë 10 muaj burg për shkak se kishte pështyrë dy policë

Një shqiptar 25 vjeçar nga Winterthuri i Zvicrës ka paguar shtrenjtë fyerjen që i ka bërë dy policëve. Gjykata e Lartë e Cyrihut i ka shqiptuar një dënim me heqje lirie dhjetë muaj dhe gjobë prej 5400 frangash të riut i cili në fjalosje e sipër i kishte pështyrë policët zviceranë.

Në janar të vitit 2009 dy policë kishin trokitur në derë të banesës ku ai kishte shkuar mysafir, për t`i thënë që ta hiqte veturën nga rruga, sepse ishte parkuar gabimisht. Pasia ai ua kthen me sharje e kërcënime dhe situata acarohet, kosovari i pështyn policët, të cilët provojnë ta bllokojnë me “pfefferspray”. Të njëjtën “armë” ua drejton edhe ai policëve, për çka përfundon në burg.

Meqë i riu kosovar kishte edhe një llogari të mëparshme, të hapur me ligjin, gjykata e qarkut në WInterthur, në tetor të vitit të kaluar ia kishte shqiptuar atij një dënim për dhunë dhe kërcënim të ushtruar ndaj policëve me 6 muaj heqje lirie. Gjykata në fjalë me këtë rast i kishte aktivizuar edhe dënimin e mëparshëm me kusht prej 10 muajsh burg.

Pas ankesës së bërë, Gjykata e lartë e Cyrihut të premten ia ka shndërruar gjashtë muajt e burgut në gjobë. Kështu, 25 vjeçari duhet të paguajë 180 njësi nga 30 franga, që i bie gjithsej 5400 franga. Mirëpo, masën ndëshkuese prej dhjetë muajsh me burg që ai e kishte nga dënimi i mëparshëm me kusht, duhet ta mbajë në sistemin e burgut gjysmë të mbyllur (nata kalohet në burg ndërsa dita në aktivitetet normale).