Policia e Kosovës shqipton gjoba në Shqipëri

Policët kosovarë shqiptojnë gjoba në bazë të rregulloreve të Kosovës, që janë 10 herë më të larta se në Shqipëri

Qytetarët e Kosovës që udhëtojnë në Shqipëri duhet të kenë kujdes gjatë vozitjes pasi gjobat super të larta, minimumi 25 euro, mund t’i marrin deri në Mirditë.

Kjo pasi Policia e Kosovës ka filluar patrullimet deri në këtë pjesë. Ata shqiptojnë gjoba në bazë të rregulloreve të Kosovës, që janë 10 herë më të larta se në Shqipëri, njoftojnë gazeta Shekulli në Shqipëri.

Një patrullë policore në afërsi të Skurajve, ku duket që në orët e para të ditës, të dy policitë po mbajnë nën kontroll akset më të ngarkuara për të shmangur aksidentet apo incidentet e ndryshme.

Nisur kjo dhe nga shifrat e larta të aksidenteve të vitit të kaluar, falë këtij bashkëpunimi, ato janë minimizuar, dhe në këtë aks rrugor autostradal, janë eliminuar; së paku prej dhjetë ditësh nuk është shënuar asnjë aksident.

Policët rrugorë kosovarë disponojnë gjithë teknologjinë e nevojshme për të argumentuar tejkalimet e shpejtësisë apo shkelje të tjera të qarkullimit rrugor, ndaj gjithçka dokumentohet me saktësi, për t’u përcjellë me procesverbale drejt njësive operacionale dhe shtabeve të drejtimit të këtij aksioni të përbashkët në qarkullimin rrugor.

Patrullat kosovare ndërrohen krye dhjetë ditësh, dhe do të zgjasë si plan bashkëpunimi i përbashkët deri më 15 shtator.