Kantonet kërkojnë shkarkim nga barra e refugjatëve

Ato kërkojnë kthimin sa më të shpejtë të refugjatëve, para së gjithash në Itali, ku kanë qëndruar para se të hynin në Zvicër

Shtohen pakënaqësitë e kantoneve me institucionet federale kur është çështja te pranimi dhe strehimi i refugjatëve nga vendet e Afrikës Veriore.

Ato kërkojnë që të krijohen mundësitë e kthimit më të shpejtë të refugjatëve, para së gjithash në Itali, vendin ku shumica e tyre kanë qëndruar para se të hynin në Zvicër. Fakti se ata kanë qëndruar në Itali i klasifikon ata si “raste të Dublinit”, dhe rrjedhimisht duhet të kthehen në vendin nga i cili kanë hyrë në Zvicër.

Konferenca e drejtorëve të policisë dhe të drejtësisë në nivel të kantoneve ka kërkuar që të ashtuquajturat “rastet e Dublinit” të përpunohen më shpejtë dhe të mos shpërndahen fare nëpër kantone.

Kantonet, në pritje të rritjes së fluksit të refugjatëve kërkojnë po ashtu edhe shtimin e personelit në qenndrat e pritjes dhe të strehimit të azilkërkuesve.

Nga ana tjetër disa nga kantonet kanë filluar përshtatjen e godinave ushtarake për strehimin e azilkërkuesve të pritshëm nga Afrika e Veriut. Kantoni i Bernës tashmë ka hapur dy kazerma ushtarake për këtë destinim.

Por, siç ka theksuar drejtori i policisë për kantonin e Bernës Hans-Jürg Käser hapja është bërë me kusht që ato të strehojnë azilkërkues për jo më gjatë se gjashtë muajt e ardhshëm.