Dialogu vazhdon në fund të qershorit

"Vazhdimi i dialogut është shtyrë që të përfundojnë përgatitjet interne, që janë të domosdoshme për marrëveshje konkrete"

Shtyrjen e raundit të pestë të dialogut teknik midis Prishtinës dhe Beogradit, që ishte caktuar për 14 e 15 qershor, zyrtarët e BE-së në Bruksel nuk e shohin si “frenim të procesit” dhe paralajmërojnë vazhdimin e negociatave në fund të qershorit.

Zyrtarë të BE-së thonë se nuk ka pasur ngecje, por që të dyja palëve t’u jepet më shumë kohë që përfundimisht të pajtohen, të paktën për disa nga çështjet e hapura.

“Vazhdimi i dialogut është shtyrë që të përfundojnë përgatitjet interne, që janë të domosdoshme për marrëveshje konkrete”, ka thënë për gazetën beogradase Veçernje Novosti, Maja Kocijancic, zëdhënëse e përfaqësueses së lartë të BE-së, Catherine Ashton, nën kujdesin e së cilës Robert Cooper ndërmjetëson në negociatat ndërmjet Beogradit dhe Prishtinës.

Si duket, ekipet negociuese nuk e kanë lehtë që të kapërcejnë dallimet e mëdha dhe të bashkohen të paktën në një pikë.

Për këtë arsye këto ditë po zhvillohet një “shutle diplomaci” intensive në mënyrë që raundi i radhës të sjellë rezultate konkrete.

Shefi i ekipit serb Borko Stefanovic ka thënë se pret vazhdimin e bisedimeve nga fundi i qershorit, ndërkohë që është shprehet optimist edhe sa i përket rezultateve.

“Ka gjasa që të arrijmë marrëveshje që në qershor rreth lirisë së lëvizjes, kadastrit, librave amzë, telekomit. Kemi video-konferenca të shpeshta. Prishtina dëshiron që të tregojë sesi Beogradi po frenon procesin dhe nuk jemi konstruktivë, por kjo thjesht nuk është e saktë. Mund të pritet që ata të përgatisin edhe interpretimin e tyre të marrëveshjes së ardhshme për opinionin publik kosovar. Ne nuk do të biem në grackën e këtyre provokimeve”, ka thënë Stefanovic.