Ashton:”Hetimi të konfirmojë të vërtetën”

"Së shpejti do të shohim hetimin, me anë të të cilit do të vërtetohet e vërteta lidhur me këtë ", ka thënë Ashton

Shefja e diplomacisë evropiane, Catherine Ashton, ka deklaruar se shpreson se së shpejti do të fillojnë hetimet me të cilat do të konfirmohet e vërteta lidhur me pohimet e Dick Martyt për kinse tregti organesh në Kosovë.

“Është në interesin e të gjithëve që të vijë deri tek e vërteta dhe atëherë do të sigurohet se drejtësia është e kënaqur”, ka thënë Ashton në një intervistë për televizionin rus “Russia Today”, transmeton gazeta Express.

Ajo ka përkujtuar se ka vizituar Prishtinën dhe Beogradin dhe se është takuar edhe me kryeministrin e Kosovës, Hashim Thaçi.

“Ajo që e kemi bërë të qartë është se nëse ka akuza, duhet përgjigjur ndaj tyre”, ka thënë Ashton, duke shtuar se e vërteta duhet konfirmuar edhe nëse akuzat janë të rreme.

“Shpresoj se së shpejti do të shohim hetimin, me anë të të cilit do të vërtetohet e vërteta lidhur me këtë dhe nëse do të jetë e nevojshme disa njerëz do të dalin para organeve të drejtësisë”, ka theksuar kryediplomatja evropiane.

27 shtete anëtare të BE-së kanë vendosur që të ngrihet një Task Forcë e veçantë e cila do të merret me hetimet e akuzave që ish- senatori zviceran, Dick Marty, i ka bërë në raportin e tij për Këshillin e Evropës.

Krijimin e këtij mekanizmi e kanë konfirmuar edhe zyrtarët e misionit EULEX në Kosovë, të cilët thonë se pasi që hetimi përfshin një dimension ndërkombëtar, Task Forca do të jetë pjesërisht me seli në Bruksel.