Sezon shumë i suksesshëm i futbollistëve shqiptarë në Zvicër

Gjatë kampionatit u angazhuan për secilin klub zviceran së paku nga një futbollist shqiptar.Më të suksesshmit dolën shqiptarët në FC Basel

Futbollistët shqiptarë në Zvicër këto vitet e fundit kanë filluar të kenë suksese në futbollin zviceran. Para disa viteve pos që numri i shqiptarëve të angazhuar në klubet futbollistike zvicerane ishte i vogël, ata edhe nuk vëreheshin shumë. E tani, në këto 2-3 vitet e fundit ky numër ka shënuar rritje të madhe sa që çdo klub i super ligës dhe chalenge ligës, pra të të dy ligave të para, ka së paku nga një futbollist shqiptar, e disa klube kanë nga dy, tre e katër shqiptarë.

Futbollistët shqiptarë më nuk shërbejnë vetëm si numër në terrenet sportive por përkundrazi, me lojërat e tyre të mira janë bërë lojtarë kyçë të skuadrave të tyre. Madje edhe lojtarë që kanë vendosur shumë herë rezultatin përfundimtar me golat e shënuar.

Tërë këto merita mendojmë se i kanë arritur vetëm me punë dhe angazhimin e tyre. Se është kështu kjo u vërtetua gjatë Kampionatit Botëror për të rinj M17 të mbajtur në Nigeri ku kombëtarja zvicerane u shpall kampione e në përbërjen e saj kishte tre futbollistë shqiptarë. Kapitenin Frederik Veseli, Granit Xhaka e Pajtim　Kasami. Pastaj në Kampionatin Botëror vitin e kaluar në Afrikën Jugore, në përbërjen　zvicerane ishin: Xherdan Shaqiri, Valon Behrami dhe Albert Bunjaku.

Por　sezoni më i suksesshëm i futbollistëve shqiptarë　është ky që sapo përfundoi. Gjatë　kampionatit zviceran të sapo përfunduar në　dy ligat e para, u angazhuan për secilin klub së paku nga një futbollist shqiptar. Suksesin më të madh e arritën shqiptarët e FC Baselit, Xherdan Shaqiri, Granit Xhaka, Beg Ferati dhe Taulant Xhaka, të cilët dhanë kontribut shumë të madh në fitimin e titullit.

Po ashtu edhe　për klubin e Zurichut, i cili përfundoi në vendin e dytë, u angazhuan me shumë sukses futbollistët Admir Mehmedi e Adrian Nikçi. I pari ishte edhe shënuesi më i mirë i skuadrës me 10 gola, e i dyti shënoi 7 gola.

Edhe në klubet tjera të super ligës, futbollistët shqiptarë dhanë kontributin e tyre. Vlen të përmendën Milaim Rama dhe Muhamed Demiri në FC Thun, pastaj Burim Kukeli në FC Lucern, Kristian Nushi në FC St. Gallen, Amir Abrashi në FC Grasshopper, e shumë e shumë të tjerë. Po ashtu edhe në ligën e dytë, numri i futbollistëve shqiptarë ishte i madh, të cilët me lojërat e tyre dhanë kontributin për klubet e tyre.

Mundi dhe puna e futbollistëve shqiptarë u vëzhgua nga shumë ekspertë futbolli, edhe nga selektori zviceran i cili në ndeshjen e fundit të Zvicrës për kualifikime për kampionatin Evropian kundër Anglisë angazhoi hiq më pak se 5 futbollistë shqiptarë. Në këtë ndeshje Shaqiri, Xhaka e Behrami luajtën nga fillimi, kurse Blerim Xhemajli dhe Admir Mehmedi u aktivizuan në pjesën e dytë. Kjo pesëshe shqiptare ishte pjesë e suksesit të Zvicrës e cila në këtë ndeshje barazoi ndaj anglezëve.

Edhe në grupmoshat e reja, U19, në kuadër të eliminatorëve për Kampionatin Evropian i cili gjatë korrikut mbahet në Rumani e ku Zvicra nuk arriti kualifikimin, u angazhuan tre shqiptarë: Frederik Veseli, Arlind Ajeti dhe Berat Xhemshiti.

Nga 10 qershori në Danimarkë mbahet Kampionati Evropian i futbollit për grupmoshat U21, ku merr pjesë edhe reprezentacioni i Zvicrës. Në mesin e futbollistëve tjerë edhe në këtë përbërje bëjnë pjesë 5 shqiptarë: Xherdan Shaqiri, Granit Xhaka, Pajtim Kasami, Admir Mehmedi dhe Amir Abrashi.　Në këtë kampionat Zvicra është favorite që të fitojë njërin ndër tre vendet e para, e në anën tjetër priten lojëra të mira të futbollistëve shqiptarë, sidomos nga Shaqiri, Xhaka e Mehmedi.

Në fund duhet theksuar se pas një sezoni të suksesshëm futbollistik, shumë skuadra të njohura evropiane kanë shprehur interesimin e tyre që t`i angazhojnë futbollistët shqiptarë të cilët luajnë në Zvicër. Këtu vlen të veçohet Xherdan Shaqiri, i cili vlerësohet një talent i madh për të cilin së fundi ka shprehur interesim Mançester Junajded, Juventusi dhe ekipe tjera. Shaqiri momentalisht vlerësohet se vlen 13, 5 milion franga.