Mbreti Huan Carlos i Spanjës për vizitë në Zvicër

Çifti mbretëror i Spanjës, Mbreti Huan Carlos I dhe Mbretëresha Sofia kanë ardhur sot për një vizitë dyditëshe në Zvicër. Pas aterrimit në Aeroportin e Cyrihut ata me një tren special kanë udhëtuar për në Bernë.

Një ndalesë çifti mbretëror e ka bërë në lokalitetin Kehrsatz të Bernës. Këtu, të shoqëruar nga presidentja e vendit, Calmy-Rey dhe ministrja spanjolle e punëve të jashtme, Trinidad Jimenez, ata janë pritur nga një kor fëmijësh me këngë të të dy vendeve.

Ndërsa në Bernë bartësit e kurorës spanjolle janë pritur me nderime ushtarake dhe pastaj kanë vazhduar aktivitetet kryesisht në ndërtesën e Parlamentit dhe Qeverisë Federale. Këtu mbreti Huan Carlos dhe presidentja e Zvicrës Calmy-Rey kanë mbajtur fjalime para deputetëve. Pas kësaj dy krerët do të zhvillojnë bisedime ndërshtetërore.

Me gjithë faktin se mbreti në Spanjë nuk prononcohet për çështje të veçanta politike, ai është përfaqësues i politikës së jashtme të vendit të tij.

Mbreti Huan Carlos për herë të fundit ka vizituar Zvicrën zyrtarisht në vitin 1979.