Ndërron jetë Leoni i vogël

Përmes një aksioni të gjerë të grumbullimit të ndihmave ishte mundësuar trajtimi i Leonit në klinikën e Münsterit

Të mërkurën, më 11 maj ka ndërruar jetë foshnja një vjeçe Leon Bujupi që vuante nga leukemia dhe gjendej për shërim në Gjermani, në Klinikën Universitare në Münster. Përmes një aksioni të gjerë të grumbullimit të ndihmave ishte mundësuar trajtimi i Leonit në këtë klinikë.

“Sëmundja e leukemisë mjerisht në asnjë moment nuk është arritur të vihej nën kontroll dhe në trupin e fëmijës nuk ka pasur fuqi rezistuese ndaj sëmundjes. Përkundër trajtimit të kompletuar onkologjik dhe intensiv mjekësor që i është bërë, ka ndodhur një dështim i papërballueshëm i disa organeve përnjëherësh”, thuhet në komunikatën e klinikës.

Siç kanë shkruar mediet gjermane, për të ndihmuar materialisht shërimin e Leon Bujupit ka apeluar edhe këngëtari i njohur Ardian Bujupi, pjesëmarrës në kontestin DSDS.