Në fund të majit, Policia e Kosovës ndërhyn në veri

Në bazë të paralajmërimeve pritet që në javën e tretë të majit, Policia e Kosovës të ndërhyjë në veri, me qëllim të godas rrjetin kriminal dhe të vendos rendin dhe ligjin në këtë pjesë të shtetit.

Zyrtarë policorë kanë konfirmuar për mediat ekzistimin e një plani operativ për ndërhyrje në veri. Drejtori i përgjithshëm i Policisë së Kosovës, Reshat Maliqi, ka konfirmuar planin, duke thënë se këto ditë do dihet më shumë për fillimin e veprimeve në këtë pjesë të vendit, të banuar kryesisht më serbë.

Ndërkohë, fillimit të operacioneve të goditjes së krimit atje është duke i paraprirë ndryshimi i brendshëm i Policisë së Kosovës dhe më pas, strukturimit të zinxhirit komandues, brenda pak ditëve, të fillon aksioni për goditjen e disa pikave të krimit të organizuar.

Këtë veprim, Policia e Koosvës pritet të ndërmerr pasi që më shumë se dy vjet pritje, EULEX-i nuk bëri ndonjë ndryshim të gjendjes atje. Për ndryshim të gjendjen kaotike atje, Policia e Kosovës dhe Ministria e Punëve të Brendshme i kanë kërkuar EULEX-it një bashkëveprim në goditjen e disa pikave kyçe të krimit.

Ndërsa, EULEX-i ka vendosur t’u përgjigjet sfidave në veri me një grup të veçantë njerëzish që do të merren vetëm me atë pjesë. Misioni i BE-së për sundimin e ligjit në Kosovë, ka krijuar një Task Force të veçantë për veriun, që objektiv do ta ketë krimin e organizuar dhe përbëhet nga policia, drejtësia dhe doganat e EULEX-it.

Krijimin e Task Forcës, kreu i EULEX-it, Xavier Bout de Marnhac ka zgjedhur që t’ia prezantojnë Këshillit të Sigurimit të OKB-së, si shembull të përkushtimit të misionit në atë pjesë të Kosovës.