Kandidatët për policë kanë problem me gjermanishten

Në Zvicër janë 1500 vende pune të lira për policët e rinj. Vendet nuk plotësohen sepse konkurruesit kanë mangësi në njohjen e gjuhës

“Askush nuk dëshiron të bëhet polic“. Kështu e përkufizon me pak fjalë problemin që ka sot policia zvicerane për sigurimin e brezit të ri të policëve, kryetari i shoqatës së policëve të Gjenevës, Christian Antonietti për gazetën “Le temps”, që citohet nga “NZZ am Sonntag”.

Por, problemi, duket më kompleks. Sipas vlerësimit të Konferencës së komandantëve të policive kantonale, aktualisht në Zvicër janë 1500 vende pune të lira për policët e rinj. Pretendues për të zënë këto vende ka mjaft, por shumica e tyre dështojnë për shkak të mangësive në njohjen e gjuhës gjermane ose në arsimimin e përgjithshëm.

Sipas shefit të sektorit për personel, në Policinë e kantonit të Bernës Hans Rütti, shumë nga konkurruesit  tregojnë mungesë njohurish edhe në përshkrimet e shkurta të gjendjes së fakteve.

Në testet e tyre për pranim, ata bëjnë shumë gabime gjuhësore.

“Është duke u rritur edhe numri i atyre që kanë probleme për plotësimin e testit të njohurive të përgjithshme, i cili përmban pyetje të nivelit të shkollës sekondare”.

Përgjegjësit policorë nga Gjeneva kanë përvoja të ngjashme. 8 deri 9 kandidatë, nga 10 sish, nuk i plotësojnë kriteret e kërkuara.   Kandidatët duhet të zotërojnë një nivel korrekt të gjuhës së folur. Por ata duhet të jenë të mirë edhe në shprehjen me shkrim, për shkakun se shkrimi i protokoleve zë vend me rëndësi në punën e përditshme të policëve. “Puna me shkrim përbën 50 për qind të punës që kryejnë  policët”, ka thënë Marco Bisa nga Policia e Cyrihut.    Për të zbutur problemin e sigurimit të numrit të mjaftueshëm të policëve të rinj të kualifikuar, policia zvicerane po ndërmerr fushata të ndryshme si shpalljet në internet, (edhe në facebook), spote publicitare në kinema etj.