73 rastë të korrupsionit po hetohen nga prokuroria speciale

Prokuroria Speciale e Kosovës po punon në 73 raste të korrupsionit të profileve të ndryshme.  Një numër i konsiderueshëm zyrtarësh të Qeverisë së Kosovës, si ministra, ish-ministra, sekretarë permanentë, shefa prokurimesh e menaxherë ndërmarrjesh publike, janë në procedura hetimore për vepra penale të krimit të organizuar, ryshfetit, keqpërdorime të detyrës zyrtare, kontrata të dëmshme ekonomike e vepra të tjera penale. 

Burime brenda kësaj Prokurorie, i kanë thënë “Kohës Ditore” se rastet më të mëdha, në të cilat janë fokusuar hetimet janë rasti i ish-ministrit të Transportit dhe Postë-Telekomunikacionit të Kosovës, Fatmir Limaj, rasti i zyrtarëve të Bankës Qendrore në krye me ish-guvernatorin Hashim Rexhepi, rasti i vreshtarisë së Suharekës, për të cilën është i dyshuar kryetari i Komunës së Suharekës, Blerim Kuçi, e ai i PTK-së që ka të bëjë me “Z-Mobile” etj. Sipas këtyre burimeve, disa nga këto 73 raste janë në fazën finale dhe pritet të rezultojnë shpejt me ngritje të aktakuzave dhe nisjen e gjykimeve.