Kantoni i Cyrihut zgjedh parlamentin dhe qeverinë

Në Cyrih sot janë duke u zhvilluar zgjedhjet për qeverinë kantonale dhe për Parlamentin Kantonal

Në Qeverinë aktuale te Kantonit, partia socialdemokrate (SP} ajo popullore (SVP) dhe liberale (FDP) kanë nga dy vende ndërsa CVP ka një vend.

Nga të gjithë qeveritarët aktualë, vetëm njëri nga SP, Markus Notter nuk ka rikandiduar. Vendin e tij tash e pretendon bashkëpartiaku i tij, Mario Fehr.

Për shkak të madhësisë dhe peshës që ka kantoni i Cyrihut, zgjedhjet që po mbahen sot në këtë kanton konsiderohen si një testim për zgjedhjet federale që mbahen në vjeshtën e këtij viti.

Karakteristikë e zgjedhjeve të sotme pritet të jetë ndikimi në rezultate i efektit “Fukushima”, dmth shtimi i numrit të votave për partitë me program antiibërthamor. Për këtë arsye, të gjitha sondazhet parashohin rritje për Partinë e Gjelbër dhe atë të Gjelbër Liberale, dhe zvogëlim për partitë e djathta.

Ndërkaq, për postin e deputetit (këshilltarit) kantonal në këto zgjedhje kanë kandiduar 1720 veta, prej të cilëve 34% janë femra.Të gjithë këta garojnë për të zënë njërin nga 180 vendet në Parlamentin e Kantonit të Cyrihut.