Komuna e Vitisë shton kapacitetet për t’i pritur më mirë mërgimtarët

Janë mobilizuar autoritetet komunale në Viti me qëllim të ofrimit të shërbimeve sa më të mira dhe të shpejta për bashkatdhetarët, të cilët vijnë për pushime.

Drejtoria e Administratës ka përgatitur një plan të veprimit për periudhën korrik-gusht 2016. Gjatë këtyre muajve kjo drejtori, konkretisht sektori i gjendjes civile, arkivit dhe zyra pritëse zakonisht përballën me shtimin e kërkesave të qytetarëve për shërbime administrative, transmeton albinfo.ch.

Isak Sadiku, drejtor i Drejtorisë për Administratë në Komunën e Vitisë, tha për mediat lokale se edhe gjatë kësaj periudhe, kur do të shtohet vëllimi i punës në këtë drejtori, ata janë të përgatitur që të presin sa më mirë bashkatdhetarët, të cilëve u ofrohen sportele të kësaj drejtorie për shërbimet administrative.

Përveç shtimit të kapaciteteve, autoritetet komunale kanë premtuar se nëse vjen deri te shtimi i kërkesave të qytetarëve për shërbime administrative, do të zgjasin edhe orarin e punës për shërbyesit civilë në sektorin e gjendjes civile, sektorin e arkivit dhe në zyrën pritëse.