Miratohet buxheti, punëtorët e PTK-së dhunshëm tentuan të hyjnë në Kuvend

Në ditën e fundit para skadimit të afatit, Kuvendi i Kosovës, sot e miratoi buxhetin për vitin 2011. Miratimi i buxhetit vijoi pas debatit të ashpër parlamentar midis partive në pushtet dhe opozitës, e cila kundërshtoi buxhetin e propozuar nga Qeveria.

Me miratimin e buxhetit u zhbllokuar kriza për procedimin e mjeteve buxhetore me rritjet deri në 50 për qind për administratën publike, punëtorët e arsimit, shëndetësisë dhe policisë, ndërsa parashihet rritje ekonomike për 5.5 për qind.

Për buxhetin për këtë vit kalendarin që kap shumën 1 miliardë e 264 milionë euro të hyra buxhetore, ndërsa 1 miliardë e 434 milionë euro shpenzime, kanë votuar 66 deputetë, 25 ishin kundër dhe 12 abstenuan.

Edhe gjatë votimit të sotëm opozita kundërshtoi nenin 4 të projekt-buxhetit, me të cilin është aprovuar edhe shitja e Postës dhe Telekomit të Kosovës (PTK). Miratimi në pako i buxhetit me shitjen e PTK-së nga opozita u cilësua si joligjore dhe jokushtetuese.

Ndërsa mbahej seanca parlamentare, sindikalistët e PTK-së, në shenjë proteste për shitjen e kësaj kompanie publike, kanë thyer derën e Kuvendit në tentim për të hyrë dhunshëm në ndërtesën e Kuvendit. Por protestuesit janë ndalur nga Njësia Speciale e Policisë, ndërsa dy protestues janë arrestuar.