Austria mbështet dialogun Kosovë-Serbi

Presidenti Behgjet Pacolli dhe kryeministri Hashim Thaçi, në takime të ndara, kanë takuar sot shefin e diplomacisë së Austrisë, Michael Spindelegger.

Spindelegger theksoi mbështetjen e vendit të tij për të gjitha proceset që po kalon Kosova. Sipas tij, Austria ka qëndrim pozitiv për përfshirjen e Kosovës në liberalizimin e vizave, por, sipas tij, duhet plotësimi i parakushteve. Ai tha se Austria do ta ndihmojë Kosovën në të gjitha proceset, sepse siç tha ai është edhe në interes të të gjithëve ta ndihmojnë Kosovën në rrugën drejt BE-së.

“Një ditë Kosova dhe Serbia do të jenë pjesë e BE-së, por kjo tha ai nuk nënkupton se do të jetë ‘nesër’ sepse ka çështje për të zgjidhur ndërmjet këtyre dy shteteve”, ka thënë Spindelegger.

Ndërkaq, presidenti Pacolli ka thënë se kanë biseduan për bashkëpunimin reciprok. Po ashtu, sipas tij, me diplomatin austriak është biseduar edhe për proceset integruese, zhvillimin ekonomik, dhe në këtë drejtim tha se Austria është e gatshme për ta ndihmuar Kosovën.

Kryeministri Thaçi ka thënë se vizita e dytë në Kosovë e ministrit Spindelegger brenda një periudhe relativisht të shkurtër është tregues i qartë i përkushtimit  dhe avancimit të  mëtutjeshëm te bashkëpunimit ne mes dy vendeve tona.

“Përkrahja e mëtutjeshme për proceset politike e posaçërisht për përafrimin e shtetit tonë me Bashkimin Evropian është shumë e nevojshme”, ka thënë Thaçi.

Shefi i diplomacisë austriake ka përkrahur nisjen e dialogut ndërmjet Kosovës dhe Serbisë, si dhe ka premtuar mbështetjen e vendit të tij Austrisë në proceset integruese të Kosovës në BE.