Ardita Statovci zëvendëson ikonën botërore të pianos, Martha Argerich

Kjo është një ftesë shumë e veçantë, një shans i rrallë dhe një ëndërr për pianistët si edhe gjithë muzicientët nga mbarë bota

Pianistja e re kosovare Ardita Statovci, është ftuar për të interpretuar si soliste në vend të ikonës së pianizmit botëror, Martha Argerich-it, nën dirigjimin e njërit nga dirigjentët më të mëdhenj të kohës së sotme, Claudio Abbado-s, e shoqëruar nga orkestrat “Gustav Mahler Chamber Orchestra” dhe “Mozart Orchestra”.

Në fillim të prillit Statovci do të mbajë provat si soliste në koncertin për piano dhe orkestër nga Raveli, në Ferrara, Itali. Kjo është një ftesë shumë e veçantë, një shans i rrallë dhe një ëndërr për pianistët si edhe gjithë muzicientët nga mbarë bota!

Përveç kësaj, javën e ardhshme Ardita Statovci, niset në një turne tjetër në Italinë veriore, ku do të performojë si soliste me koncert të Mozartit për piano dhe orkestër në sallat e mëdha të qyteteve Bolzano, Trento dhe Bressanone nën shoqërimin e orkestrës Haydn Orchestra me dirigjentin italian Tito Ceccherini-n.