S’ka liberalizim të shpejtë të vizave

Siç ka raportuar Reuters nga burimet e saj brenda BE-së, shtetet anëtare nuk kanë arritur të dakordohen që t’i lehtësojnë rregullat e udhëtimit për qytetarët e Gjeorgjisë, Turqisë, Ukrainës dhe Kosovës

Për shkak të frikës së madhe për migrim masiv, disa nga shtetet anëtare të Bashkimit Evropian nuk janë pajtuar që Gjeorgjisë, Turqisë, Ukrainës dhe Kosovës t’i hiqen vizat shpejt, por të shtyhet edhe për një kohë. Sipas parashikimeve, liberalizimi për këto shtete është shtyrë për vjeshtë, dhe jo gjatë verës siç pritej.

Siç ka raportuar Reuters nga burimet e saj brenda BE-së, shtetet anëtare nuk kanë arritur të dakordohen që t’i lehtësojnë rregullat e udhëtimit për qytetarët e këtyre shteteve, përfshirë Kosovën. Nuk bëhet i ditur ndonjë afat i ri se kur Brukseli do të marrë vendim për vendet që kanë marrë rekomandim pozitiv nga Komisioni Evropian.

Siç njofton Reuters, BE tani ka kthyer fokusin kah kriza e emigrantëve, transmeton Gazeta Express.

“Rasti i Kosovës, një vend tjetër optimist për vizat, po ashtu është zvarritur edhe pse Komisioni Evropian ka rekomanduar udhëtim pa viza për të gjitha katër shtetet e lartpërmendura, i kanë thënë Reutersit burime brenda Bashkimit Evropia”, shkruan Reuters.

Komisioni Evropian ka rekomanduar në fillim të muajit të kaluar që Kosovës t’i hiqen vizat. Lajmi ishte pritur me entuziazëm në Kosovë edhe pse nuk duhej qartësisht se kur Parlamenti Evropian dhe Këshilli i BE-së do ta trajtonte këtë çështje.

Në Prishtinë, kishte shumë optimizëm se vizat mund të hiqen në qershor, ose më së largu në shtator.

Por siç ka raportuar edhe “Zëri” , Kosova në këtë rast ka rënë preh e turqisë, e cila ka mosmarrëveshje me BE-në. Pezulluar vendimi për liberalizimin e vizave për Turqinë, kjo ka ndikuar që edhe vendimi për heqjen e vizave për Kosovën të shtyhet deri në vjeshtë. Mbetet që javën e ardhshme të diskutohet vetëm për Gjeorgjinë. Kështu kanë bërë të ditur burime të kësaj gazete nga Brukseli.