Presidentja Rey vizitën e parë e bën te kancelarja Merkel

Presidentja e Zvicrës, Calmy Rey do të përpiqet të fitojë mirëkuptimin e Gjermanisë për pozicionet zvicerane

Vizitën e saj të parë në cilësinë e presidentes së Zvicrës, Micheline Calmy Rey e zhvillon sot në Gjermani.

Përpjekjet e presidentes në takimin me kancelaren Merkel kësaj here do të përqendrohen kryesisht në sigurimin e mirëkuptimit të Gjermanisë për pozicionin e Zvicrës.

Çështja e tatimeve do të jetë në kreun e listës së problemeve që pritet të diskutohen. Zvicra kërkon një qasje më të mirë për bankat e saj në tregun gjerman.

Qëndrimi i Zvicrës ndaj Bashkimit Evropian është tema tjetër me peshë e vizitës. Gjermania ka shfaqur mirëkuptim për rrugën bilaterale të zgjedhur nga Zvicra por kërkon që kjo të realizohet në mënyrë më efikase.

Euroja, çështjet e trafikut dhe dumpingu i pagave janë disa nga temat tjera që do të kenë në tavolinë dy shefet e dy shteteve fqinje në takimin e sotëm, shkruan drs.ch.

Zvicra e ka bërë të qartë kërkesën drejtuar punëtorëve që vijnë nga Gjermania që të respektojnë pagën minimale në tregun e punës në Zvicër.