Kundër shërbimit të detyruar ushtarak, për një ushtri profesioniste

Propozimi i bërë dje nga deputeti liberal i Gjenevës, Pierre Maudet, ka ndarë në dysh opinionin zviceran

Të hiqet shërbimi i detyruar ushtarak dhe në vend të tij, mbrojtja e vendit të bëhet përgjegjësi e një ushtrie profesioniste prej gjithsej 20 mijë trupash. Një propozim të tillë e ka bërë dje deputeti liberal (FDP) nga Gjeneva në Parlamentin Federal, Pierre Maudet dhe me këtë ka ndarë në dysh opinionin zviceran.

Siç shkruan blick.ch, Maudet nuk është i vetëm në qëndrimin e tij. Ish kryeshefi i forcave të armatosura të Zvicrës, Walter Keckeis shprehet po ashtu për një ushtri profesioniste dhe kundër shërbimit të detyruar ushtarak.

Por, politikanë tjerë kanë mendim tjetër. Partia Popullore e Zvicrës (SVP) ka reaguar me forcë ndaj këtij propozimi. Ajo madje ka quajtur FDP-në si „kërcënuesen më të madhe të sigurisë së Zvicrës”.

Ndërsa kryeshefi aktual i Armatës Zvicerane Andre Blattmann ende nuk është deklaruar lidhur me propozimin për heqjen e shërbimit të detyruar ushtarak.