Bizneset nga Kosova, vizitë bizneseve të diasporës

Ministri kosovar i Diasporës, Valon Murati, së bashku me disa biznese të Kosovës po qëndron në Austri.

Me organizim të përbashkët të Ministrisë së Diasporës, Rrjetit të Bizneseve Shqiptare të Diasporës, Odës Amerikane në Kosovë, Ministrisë së Tregtisë dhe Industrisë, përkatësisht KIESA-s si dhe me përkrahjen e UNDP-së, ministri Valon Murati është duke marrë pjesë në vizitën e bizneseve kosovare në diasporë.

Në këtë vizitë janë duke marrë pjesë një numër i bizneseve të suksesshme nga Kosova dhe janë pritur nga biznese të diasporës shqiptare.
Në kuadër të kësaj vizite është mbajtur edhe takimi i përbashkët nga Kosova dhe Austria, ku janë prezantuar bizneset e Kosovës, si dhe janë hapur mundësi të reja të bashkëpunimit.

Po ashtu janë vizituar edhe disa nga bizneset e suksesshme të diasporës shqiptare në Austri, si “Blakaj Fenster und Turen”, “Tolaj GmbH” dhe “Immobilienverwetung GmbH”, thuhet në një njoftim të MD-së.

Si rezultat i këtij forumi pritet të nënshkruhen kontrata për bashkëpunim ndërmjet bizneseve nga Kosova, ato të diasporës dhe bizneseve austriake në fusha të ndryshme, ndërsa grupi do të vazhdojë vizitën në formatin e njëjtë ditët në vazhdim edhe në Berlin të Republikës Federale të Gjermanisë.