Mustafa kërkon mbështetje për të luftuar ekstremizmin

Kryeministri i Kosovës, Isa Mustafa tha se Qeveria e Kosovës e ka prioritet parandalimin e ekstremizmit dhe radikalizmit që qon në terrorizëm. Për këtë ai kërkoi mbështetje  

Kryeministri i Kosovës, Isa Mustafa kërkoi mbështetje nga të gjithë faktorët relavent për të parandaluar ekstremizmin e dhunshëm dhe radikalizmin që shpie në terrorizëm. Ai këto deklarata i bëri në konferencën e donatorëve lidhur me zbatimin e Strategjisë për parandalimin e ekstremizmit dhe terrorizmit.

Mustafa tha se Qeveria e Kosovës e ka prioritet parandalimin e ekstremizmit dhe radikalizmit që qon në terrorizëm.

“Me rastin e aprovimit të Strategjisë për parandalimin e ekstremizmit të dhunshëm dhe radikalizmit që shpie në terrorizëm, për periudhën 2015-2020, ne kemi vlerësuar se sikurse radikalizmi ashtu edhe terrorizmi nuk janë çështje të cilat mbërthehen vetëm në një vend, në një regjion, në një kontinent, por kapërcejnë këta kufij. Prandaj edhe lufta dhe aleanca kundër këtyre dukurive duhet të jetë globale”, tha Mustafa.

Kosova, sipas kryeministrit, vlerësohet se është një vend i vogël, por ka përgjegjësinë e vet në këtë luftë të përbashkët, “sepse pasojat nga terrorizmi janë shumë të mëdha, janë afatgjate dhe kërkojnë domosdoshmërisht një aleancë të përbashkët që ne ato t’i tejkalojmë dhe të luftojmë kundër tyre”.

Strategjia e qeverisë, sipas kryeministrit Mustafa, definon disa faza të punës për  parandalimin e ekstremizmit dhe terrorizmit. “Ky parandalim kërkon masa të ndryshme edhe në fushën e arsimit, në mënyrë që njerëzit në shkolla të edukohen në formën e atillë që mos të orientohen në mënyrë të dhunshme”, tha ai.

Po ashtu sipas Mustafës, strategjia anti-terror kërkon masë edhe në fushën e ekonomisë, në mënyrë që atyre t’iu sigurohet punësimi dhe mirëqenia, dhe kjo mos të jetë shkas i bashkimit me grupe të ndryshme.

“Strategjia kërkon po ashtu edhe masa të riedukimit të atyre që kanë qenë në fronte të ndryshme dhe kthehen, sepse paraqesin rrezik të veçantë për vendin, dhe ne duhet të punojmë bashkërisht se si ata t’i riintegrojmë, por natyrisht edhe organet e drejtësisë duhet të punojnë me masa të caktuara”, tha kryeministri.