Pas sirianëve, shqiptarët të dytët për azil në Gjermani

Sipas të dhënave, rreth 55 mijë shtetas shqiptarë kanë aplikuar për azil në vitin 2015 në Gjermani, duke e renditur Shqipërinë në vendin e dytë pas Sirisë. Kosova mbetet e treta

Autoritetet gjermane publikuan të dhënat e plota në lidhje me azilkërkuesit për vitin 2015 dhe ashtu siç edhe pritej, numri i shtetasve shqiptarë ka arritur shifra rekord. Sipas të dhënave, rreth 55 mijë shtetas shqiptarë kanë aplikuar për azil në vitin 2015, shifër kjo që e rendit Shqipërinë në vendin e dytë pas Sirisë.

Në vendin e tretë, sipas të njëjtave rezultatet, radhitet Kosova.

Numri i emigrantëve nga Shqipëria në 2015 shënoi një rritje me mbi 5 herë krahasuar me kërkesat për azil në 2014, të cilat ishin pak më shumë se 8 mijë, raporton TCH.

Në të njëjtin nivel kishin qenë dhe shifrat e azilkërkuesve nga Kosova. Por, ajo që tregohet në këto statistika, është fakti se në tre muajt e fundit të vitit të kaluar ka rpnë numri i azilkërkuesve shqiptarë. Në tetor kërkuan azil 4,680 shqiptarë, në nëntor 3.044 persona dhe 1.801 në muajin dhjetor.

Në 10 vendet e para për refugjatë në Gjermani janë vende ballkanike, Shqipëria, Kosova, Serbia dhe Maqedonia.

Ndryshe, dyndjet më të mëdha të azilkërkuesve në Gjermani u shënuan në fillim të vitit 2015, atëherë kur në Shqipëri e Kosovë u dha një alarm i rremë se Gjermania po pranon refugjatë ekonomik. por, për të stopuar ardhjen e refugjatëve ballkanas, autoritetet gjermane vendosën t’i njohin këto shtete si “vende të sigurta origjine”.