Kosovë, nga marsi pensionet deri 240 euro

Deri në fund të muajit mars, pensionistët kontributdhënës do t’i marrin pensionet 240 euro, ndërsa pensionet më të ulëta do të jenë 160 euro, ka thënë ministri Abrashi

Ministri i Punës dhe Mirëqenies Sociale, Arban Abrashi deklaroi se deri në fund të muajit mars, pensionistët kontributdhënës do t’i marrin pensionet 240 euro, ndërsa pensionet më të ulëta do të jenë 160 euro. Abrashi tha se është plotësuar infrastruktura ligjore për rritje të pensioneve.

Deri në fund të muajit mars të këtij viti pensionistët kontributdhënës në Kosovë do të kenë afat të dorëzojnë dokumentacionin e nevojshëm për përmbushjen e kritereve për rritje të pensioneve. Dy kriteret themelore që janë vendosur në kategorizimin e pensionistëve kontributdhënës është përvoja e punës dhe arsimimi.

Sipas kalkulimeve preliminare të bëra nga Ministria e Punës dhe Mirëqenies Sociale, kategoria më e lartë e pensionistëve kontributdhënës do ta ketë pensionin 240 euro, derisa kategoria më e ulët deri në 160 euro, raporton gazeta “Zëri”.

Ministri Arban Abrashi, Ministri i Punës dhe Mirëqenies Sociale, ka bërë të ditur se janë duke plotësuar infrastrukturën ligjore rreth këtij procesi. Udhëzimi Administrativ, i cili përcakton kategorizimin në bazë të kritereve, ka treguar Abrashi, është në përfundim e sipër. “Aty parashihen formularë të rinj dhe ne do të bëjmë hapjen e aplikimit për të gjithë pensionistët kontributdhënës, të cilët do të sjellin, qoftë dokumentacion që vërtetojnë shkollimin që kanë pasur si dhe përvojën e punës”, ka thënë ai.

Ndryshe, në Kosovë janë të evidentuar 40 mijë pensionistë kontributdhënës, të cilët aktualisht marrin nga 140 euro në muaj.