Lajme

“Rrëfime të shkurtra…” që mund të mbahen mend gjatë

Me fjalët e tyre për librin e Enver Robellit u paraqitën: Shpresa Jashari, gjuhëtare, Ylfete Fanaj, politikane dhe Prof. Dr. Omer Xhemali, mjek i njohur shqiptar në Zvicër

E shtunë, 21 Janar 2023 - 20:40 Blerim Shabani

“Ardhmëria sapo ka filluar”. Ishte kjo një fjali çelës në prezantimin që gazetari i njohur Enver Robelli i bëri librit të tij që u promovua sot në Cyrih: “Rrëfime të shkurtra për një ditë të gjatë. Një kronikë e pazakonshme e shekullit të 20-të”. Shprehja i referohej depërtimit gjithnjë më të suksesshëm të shqiptarëve të brezit të ri në të gjitha sferat e jetës, në Zvicër.

Kjo u ilustrua edhe me një shënim futurist të ish korrespondentit të mirënjohur për Ballkan, të gazetës NZZ, Martin Woker, i cili flet për një situatë hipotetike por shumë të mundshme, të vendosur në vitin 2040, kur “ministër i mbrojtjes i Zvicrës është Ilir Gashi…”, shkruan albinfo.ch.

Një numër i madh të interesuarish kishin ardhur në ambientet e Bibliotekës “Pestalozzi” në Hardau, Cyrih, për të ndjekur promovimin e librit të Enver Robellit, një publicisti dhe krijuesi tashmë të njohur, jo vetëm ndër shqiptarët e Zvicrës.

Me fjalët e tyre për librin dhe për personalitetin e Robellit u paraqitën: Shpresa Jashari, studiuese e gjuhësisë nga Universiteti i Edukimit në Zug; politikania e njohur Ylfete Fanaj, ish-kryetare e Parlamenit të Kantonit të Luzernit dhe kandidate për ministre në kantonin e Luzernit dhe Prof. Dr. Omer Xhemali, drejtor i Klinikës së Kardiokirurgjisë në Universitetin e Zürichut. Ishte paraparë që një fjalë të saj ta paraqiste edhe Adelina Gashi, gazetare e magazinave digjitale Republik (Zürich) dhe Bajour (Basel), por për shkaqe objektive ajo nuk ishte e pranishme në promovim.

Xhetare Rexhaj

Moderimin e aktivitetit e ka bërë Xhetare Rexhaj, e cila tashmë ka marrë postin e zëdhënëses së Swisscoy-t në Kosovë, edhe një dëshmi kjo e asaj që u tha në fillim se “ardhmëria tashmë ka filluar”.

Hapjen e promovimit e ka bërë Suela Jorgaqi, drejtuese e Pestalozzi-Bibliothek. Ajo ka shprehur kënaqësinë e saj që ka mundur të ofrojë një ambient të ngrohtë për kaq shumë dashamirës të fjalës së shkruar që ishin mbledhur sot në “shtëpinë e saj”.

Suela Jorgaqi

Shpresa Jashari në fjalën e saj është marrë me momentin e njohjes me emrin e Enver Robellit si gazetar në mediat zvicerane para mbi 20 vjetësh. Ajo, në këtë kontekst ka theksuar se të shihje në atë kohë një emër shqiptari si gazetar ishte një “hap kundër rrjedhës”, duke ditur imazhin e shqiptarëve në Zvicër, të mbështetur në klishetë negative, që mbizotëronin diskursin politik dhe shoqëror atëbotë. Për librin e promovuar ajo, veç tjerash tha: “Është një mozaik kompleks ku ndërlidhen rrëfime kolektive me rrëfime dhe ndjenja personale”.

Shpresa Jashari

Ylfete Fanaj po ashtu ka folur për personalitetin e Enver Robellit në raport me komunitetin tonë në Zvicër dhe me vetë Zvicrën. Ajo, duke theksuar se ndonëse nuk i bie të lexojë shumë shqip, e ka shumë të afërt gjuhën e përdorur nga Robelli në këtë libër. Me këtë rast Fanaj ka thënë se edhe përmes librit të promovuar sot mund të kontribuohet për ruajtjen e gjuhës shqipe në brezat e rinj të shqiptarëve.

Ylfete Fanaj

Mjeku i shquar shqiptar në Zvicër, Prof. Dr. Omer Xhemali, ka evokuar njohjen para rreth dhjetë vjetësh me gazetarinë e shkruar nga Robelli dhe pastaj me vetë gazetarin. Ai ka thënë se libri që po promovohet, veç tjerash është një dëshmi se edhe ne në mërgatë mund të zotërojmë gjuhën tonë amtare në nivel të lartë, sa për të shkruar libra dhe romane.