Jeta po shtrenjtohet, eksperti tregon ku mund të kurseni para

(KEYSTONE/Christian Beutler)

Rritja e çmimeve, qirave dhe primeve të sigurimit shëndetësor po rëndon gjithnjë e më shumë buxhetet familjare në Zvicër. Eksperti i buxhetit Philipp Frei thotë se kursimi duhet të nisë nga shpenzimet që mund të ndryshohen lehtësisht, por paralajmëron që të mos bëhen kompromise në çështjet e shëndetit.

Kostoja e jetesës në Zvicër po rritet dhe, sipas Philipp Frei, drejtor i organizatës zvicerane për këshillim mbi buxhetin, gjithnjë e më shumë njerëz po kërkojnë ndihmë për menaxhimin e financave.

Sipas tij, kjo situatë nuk prek vetëm familjet me të ardhura të ulëta. Edhe njerëzit që deri tani kanë arritur t’i menaxhojnë shpenzimet po përballen me vështirësi për shkak të rritjes së vazhdueshme të kostove.

Frei rekomandon që kursimi të nisë nga shpenzimet e përditshme, si ushqimi jashtë shtëpisë, pushimet dhe blerjet. Më pas, sipas tij, duhet të rishikohen shpenzimet fikse, përfshirë kontratat e telefonisë, abonimet dhe anëtarësimet në palestra.

Një vëmendje e veçantë duhet t’i kushtohet edhe sigurimit shëndetësor. Eksperti thekson se alternativa më e lirë nuk është domosdoshmërisht më e përshtatshmja. Për shembull, zgjedhja e një franshize të lartë kërkon që personi të ketë mënjanë shumën e nevojshme për ta përballuar atë.

Ai paralajmëron gjithashtu që kursimi të mos bëhet në mënyra që mund të sjellin shpenzime më të mëdha në të ardhmen, veçanërisht kur bëhet fjalë për shëndetin. Sipas tij, problemet financiare mund të ndikojnë ndjeshëm edhe në mirëqenien mendore, pasi pasiguria dhe frika nga faturat e papritura krijojnë stres të vazhdueshëm.

Në fund, Frei thekson se këshillimi financiar nuk mund të krijojë para shtesë, por mund të ndihmojë njerëzit të kuptojnë më mirë gjendjen e tyre financiare dhe të identifikojnë në kohë problemet që mund të përkeqësohen.