32 viktima të trafikimit u identifikuan vitin e kalur në Kosovë

18 viktima kanë qenë subjekt i trafikimit për shfrytëzim seksual, shtatë kanë kryer punë të detyrueshme, tre prej tyre kanë kërkuar lëmoshë, derisa katër të tjerë janë cilësuar si “të nënshtruar plotësisht”

Edhe pse institucionet e Kosovës kanë ndërmarrë aksione të shumta për të parandaluar trafikimin me qenie njerëzore, situata në terren është mjaft shqetësuese.

Një raport i Departamentit Amerikan të Shtetit bën të ditur se gjatë vitit 2017 janë identifikuar 32 viktima të trafikimit. Aty thuhet se 18 viktima kanë qenë subjekt i trafikimit për shfrytëzim seksual, shtatë kanë kryer punë të detyrueshme, tre prej tyre kanë kërkuar lëmoshë, derisa katër të tjerë janë cilësuar si “të nënshtruar plotësisht”.

Të njëjtat statisitika i ka dhënë edhe Policia e Kosovës.

“Ne tani viktimat i kemi më tepër ato që janë vendore sesa që vijnë nga vendet e tjera. Prej 32 viktimave sa kanë qenë vitin e kaluar, ne kemi identifikuar se diku shtatë prej tyre kanë qenë nga vendet e tjera, pesë nga Shqipëria, një nga Moldavia dhe një nga Filipinet, domethënë janë identifikuar si viktima të trafikimit të shfrytëzuara në Kosovë”, ka thënë për REL, shefi i sektorit qendror të hetimit të trafikimit me qenie njerëzore, Riza Murati.

Ai ka potencuar se Policia e Kosovës ka ndërmarrë mbi 140 aksione gjatë vitit të kaluar në luftën kundër trafikimit me qenie njerëzore. Sipas tij grupet e ndryshme kriminale janë mjaft aktive në shfrytëzimin e kategorive të caktuara, kryesisht femrave dhe të miturve.