12 për qind e ballkanasve kryejnë punë me “ryshfet”

Shqipëria, me 19.3 % mitëdhënës zë vendin e dytë ndërsa Kosova me 11.1%, vendin e katërt

12 për qind të qytetarëve të Ballkanit Perëndimor dëshmojnë që gjatë vitit të kaluar u është dashur të korruptonin dikë në administratën shtetërore ose në ndonjë shërbim tjetër për tu kryer ndonjë punë. Mesatarja e shumave që ata i kanë deklaruar t`i kenë paguar si mitë është 257 euro. Në këto përfundime ka ardhur një studim i realizuar nga Zyra e OKB-së për luftimin  e drogës dhe të krimit UNODC, në bashkëpunim me komisionin e BE-së.

Sipas këtij studimi, që e transmeton portali nachrichten.at., Bosnjë Hercegovina mban titullin e kampionit për korruptim të shërbyesve të shtetit. Gjatë vitit të kaluar atje kanë dhënë para për “shërbime” të shtetit 20 për qind të të anketuarve.

Shqipëria, me 19.3 % të të anketuarve mitëdhënës zë vendin e dytë. Vendin e tretë në këtë listë të palavdishme e zë Kroacia me 11.2%, ndërsa nuk është larg as Kosova, ku 11.1% të të pyeturve kanë deklaruar se gjatë vitit të kaluar kanë korruptuar dikë nga administrata e shtetit.

Mali i zi me 9.7%, Serbia me 9.3% ndodhen nën mesataren, ndërsa çuditërisht Maqedonia del kampione e moskorruptimit në këtë listë. Atje, vetëm 6.2% të qytetarëve të anketuar janë deklaruar se kanë dhënë para “nën dorë” për të kryer punë në shtet.

Por, Maqedonia mban rekordin tjetër: atje është deklaruar mesatarja më e madhe e parave të dhëna në emër të ryshfetit. Mesatarisht 1212 euro ka dhënë një maqedonas i anketuar në emër të mitos gjatë vitit 2010.

Nga ana tjetër duket se nëpunësit shqiptarë janë më modestë në kërkesat e tyre. Kështu, ata mesatarisht kanë marrë “vetëm” 103 euro, llogaritur sipas deklarimeve të personave të anketuar nga Shqipëria.

Studimi konstaton se veçanërisht “të prekshëm” nga korrupsioni janë mjekët, infermieret dhe policia.