Zvicra, e dhjeta në botë për barazinë e gruas

Në vendet e para të listës janë: Islanda, Norvegjia, Finlanda e Suedia. Në të fundit: Arabia Saudite, Mali, Pakistani dhe Jemeni

Zvicra, ashtu sikurse në vitin 2010, edhe këtë vit e mban vendin e dhjetë në botë sa i takon sigurimit të barazisë gjinore. Këtë e tregon një listë e publikuar nga WEF (Forumi Ekonomik Ndërkombëtar), në të cilën radhiten 135 vende të botës.

Edhepse në mes të vitit 2010 dhe 2011 Zvicra nuk ka pësuar ndonjë ndryshim sa i përket radhitjes, megjithatë ajo ka bërë disa përparime në fusha të caktuara të barazisë së femrës me mashkullin.

Kështu, gjatë vitit 2011 femra ka më shumë qasje në arsim, pjesëmarrje më të madhe në ekonomi dhe në ndikimin politik.

Dy vite më parë, në vitin 2009, Zvicra kishte vetëm vendin e trembëdhjetë në lëmin e barazisë në mes të mashkullit dhe femrës.

Në vendet e para të listës, si zakonisht, bëjnë pjesë shtetet skandinave. Në vendin e parë është Islanda, e ndjekur nga Norvegjia, Finlanda e Suedia.

Në fund të listës janë shtetet si Arabia Saudite, Mali, Pakistani dhe Jemeni.