Zvicra dhe Luksemburgu, përfituesit më të mëdhenj nga migracioni

Sipas raportit më të ri të OECD-së del se imigrantët në Zvicër i kanë rritur të ardhurat tatimore të vendit për së paku 6.5 miliardë franga Neto.

Në mesin e shteteve anëtare të Organizatës për Bashkëpunim Ekonomik dhe Zhvillim (OECD), Zvicra, krahas Luksemburgut, është vendi që nxjerr përfitimet më të mëdha financiare nga të huajt që jetojnë dhe punojnë atje.

Ky konstatim del nga raporti që ka publikuar OECD me titullin “Perspektiva ndërkombëtare e migracionit 2013”, të prezantuar të enjten në Berlin dhe në Bruksel. Sipas këtij raporti del se imigrantët në Zvicër i kanë rritur të ardhurat tatimore të vendit për së paku 6.5 miliardë franga Neto.

Sipas një metode tjetër, më të lirë të llogaritjes, madje del se imigrantët i sjellin Zvicrës deri në 11 miliardë franga në vit përmes taksave. Krahasuar me brutoprodhimin vendor të Zvicrës që në vitin 2011 ka qenë 586.8 miliardë franga, kjo shumë përbën 1.9 për qind.

Nga të gjitha vendet e OECD-së, vetëm në Luksemburg kjo përqindje është më e lartë, 2.0 për qind. Po ashtu Luksemburgu dhe Zvicra kanë pasur në vitin 2011 përqindjen më të lartë të imigrantëve në raport me numrin e banorëve në mesin e shteteve të OECD-së, shkruan nzz.ch.