VfB Stuttgarti i interesuar për mesfushorin nga Kosova

Sipas një raporti të javores online italiane "tuttomercatoweb.com", "shvabët" e kanë në fokus futbollistin shqiptar

Njëri nga lojtarët i cili viteve të fundit është duke shkëlqyer në Kampionatin shqiptar, është mesfushori nëntëmbëdhjetëvjeçar Esat Mala, me prejardhje nga Mushtishti i Komunës së Prizrenit.

Për mesfushorin shqiptar, kohëve të fundit interes ka shfaqur ekipi i Bundesligës gjermane, VfB Stuttgart.

Në kërkim të përforcimit të ekipit të vet, VfB Stuttgart është duke u interesuar për talentin shqiptar nga Kategoria Superiore.

Sipas një raporti të javores online italiane “tuttomercatoweb.com”, “shvabët” e kanë në fokus futbollistin shqiptar, përcjell Albinfo.ch.

Sipas këtij raporti, përfaqësues të ekipit e kanë vëzhguar Esatin gjatë ndeshjes në mes të KF Partizani dhe KF Kamza. Në muajin janar, ai kishte kaluar nga klubi kosovar KF Ballkani në Tiranë. Në kryeqytetin shqiptar, mesfushori u adaptua për mrekulli duke u aktivizuar në tetë ndeshje, me një asistim.

Para pak kohësh, në Kategorinë Superiore, Esati u zgjodh futbollist i muajit.