Një në tre persona mbi 60 vjeç ndihet i vetmuar në Zvicër

Një studim i ri tregon se rreth 800 mijë të moshuar në Zvicër do të dëshironin të kishin më shumë shoqëri.

Më shumë se një e treta e personave mbi 60 vjeç në Zvicër ndihen të vetmuar, sipas një studimi të ri të realizuar nga instituti GFS Zürich në kuadër të një hulumtimi të porositur nga Pro Senectute, përcjell albinfo.ch.

Studimi tregon se rreth 800 mijë të moshuar në Zvicër do të dëshironin të kishin më shumë shoqëri. Problemi bëhet edhe më i përhapur me rritjen e moshës, ndërsa personat që jetojnë pa partner kanë rrezik më të madh të përjetojnë vetmi.

Sipas ekspertëve, vetmia mund të ndikojë edhe në cilësinë e jetës dhe shëndetin e të prekurve, duke çuar në izolim social, mungesë aktiviteti fizik dhe probleme psikologjike.

Për ta luftuar këtë gjendje, Pro Senectute rekomandon aktivitete që mundësojnë kontaktin me njerëz të tjerë, si angazhimi vullnetar, pjesëmarrja në kurse, grupet e ecjes apo aktivitete të ndryshme sociale./Albinfo.ch

---