Trefishohet numri i shefave gjermanë në Zvicër

Mbi 50 mijë shtetas gjermanë kryejnë funksionin e shefit në ndonjë firmë zvicerane. Në vitin 2002 ishin 16271 të tillë

Çështja e “vërshimit” të gjermanëve në Zvicër, të cilën e pati problematizuar javën e kaluar politikania e SVP-UDC-së Nathalie Ricklin, me gjithë kundërshtimet e ashpra të fillimit, po vazhdon të pasqyrohet në shtypin zviceran.

Kështu, sipas një studimi të kryer nga shërbimet ekonomike informative Teledata dhe Infocube, të cilit i referohet gazeta “Der Sonntag”, në Zvicër ka tre fish më shumë shefa gjermanë të firmave se që kishte para dhjetë vitesh.

Aktualisht, sipas gazetës, në Zvicër janë mbi 50 mijë shtetas gjermanë që kryejnë funksionin e shefit në ndonjë firmë të këtushme. Në vitin 2002 ishin 16271 të tillë, shifër kjo që tregon për trefishimin e numrit të personave të kësaj kategorie.

Në kategorinë e menaxherëve studimi ka konstatuar rritjen nga 9038 që ishte në vitin 2002, në 28501 në vitin 2012. Ndërsa numri i gjermanëve në këshillat menaxhues të firmave zvicerane është rritur nga 7233 (2002) në 21992 (2012).