Përurohet në Cyrih skulptura e Sislej Xhafës

I pranishëm do të jetë edhe autori i skulpturës që përurohet, artisti kosovar Sislej Xhafa, i cili do të flasë para publikut

Këtë të premte, më 23 shtator, në Parkun Hardau të qytetit të Cyrihut do të bëhet përurimi i skulpturës së punuar nga artisti kosovar me qëndrim në SHBA, Sislej Xhafa.

Kjo skulpturë, në trajtën e shkronjës Y qe zgjedhur më e mira në një konkurs që pati shpallur Komuna e Cyrihut para dy vitesh.

Përurimin e skulpturës e organizon zyra për arte dhe ndërtim e Cyrihut. Solemniteti fillon në orën 19.30 dhe përfundon në orën 21.30. Fjalën e përshëndetjes do ta mbajë këshilltarja e qytetit të Cyrihut, Ruth Genner (anëtare e qeverisë, përgjegjëse për sektorin e ndërtimit).

Një vështrim për veprën e artistit Xhafa do ta mbajë profesori në Shkollën e Lartë të Arteve të Cyrihut, Christoph Schenker. Po ashtu të pranishmëve do t`u drejtohet edhe autori i skulpturës që promovohet, Sislej Xhafa.

Ndërtimi i skulpturës Y është mundësuar me bashkëpunimin në mes të Grün Stadt Zürich, dhe Isntitutit për Arte Bashkëkohore, pastaj Shkollës së Lartë për Arte dhe po ashtu me mbështetjen financiare të fondacionit G+B Schwyzer Stiftung, Baugenossenschaft Zurlinden dhe Migros-Kulturprozent.

Në vendin ku është ngritur skulptura, në Hardaupark, nga Stacioni Kryesor Hekurudhor i Cyrihut shkohet me tramvajin numër 2 ose 3 deri në Albisriederplatz. Ndërsa nga stacioni i trenit Hardbrücke, me autobusin nr. 33, po ashtu deri në Albisriederplatz.