Nis verifikimi i të burgosurve politikë kosovarë

Kryeministri Hashim Thaçi i ka inkurajuar ish të burgosurit politikë që të aplikojnë për të marrë statusin e ish të burgosurit. I pari këtij aplikacioni i është përgjigjur Adem Demaçi

Pas përmbylljes së aplikimit për statusin e veteranit të UÇK-së, Qeveria e Kosovës e ka filluar të enjten një aplikimin tjetër, atë për verifikimin e ish-të burgosurve dhe të përndjekurve politikë kosovarë. I parë që i është përgjigjur këtij aplikimi, ka qenë simboli i rezistencës Adem Demaçi.

Ky i fundit, i cili ka qëndruar brenda grilave rreth 28 vjet, u shpreh i lumtur që më në fund institucionet e Kosovës filluan të përkujdesën për këtë plejadë njerëzish, që sakrifikuan jetën dhe familjen për lirinë e vendit.

“Jam këtu me ju, por mendjen e kam me ata, dëshmorët tanë dhe nuk ka para që mund t’i paguajë ata njerëz, të cilët me vetëdije shkuan drejt vdekjes, që ne sot të jetojmë të lirë, shprehemi lirshëm dhe të përpiqemi të bëjmë diçka për popullin tonë”, tha Demaçi i cili është quajtur me epitetin “Mendela i Evropës”.

Këto komente Adem Demaçi i bërë gjatë fillimit zyrtar për aplikimin e statusit të përndjekurit dhe të burgosurit politikë, ku ishte i pranishëm edhe kryeministri Hashim Thaçi me bashkëpunëtorët e tij.

Ndërkaq, në emër të Shoqatës së të Burgosurve Politikë, kryetari i kësaj shoqate, Hydajet Hyseni, i cili tha se po fillojnë rregullimin me ligj të një padrejtësie të gjatë, të gjerë, të thellë, shumë të veçantë – realizimin e të drejtave të një të burgosuri politik.

“Sot po fillon procesi i aplikimit për këtë të drejtë, pasi që janë bërë të gjitha përgatitjet e duhura ligjore dhe institucionale dhe, sot është rasti për të shprehur mirënjohje për gjithë ato sakrifica që janë bërë dhe veçanërisht për dëshmorët e lirisë, të të gjithë brezave, të gjitha mënyrat e sakrificës deri te Epopeja e lavdishme e UÇK-së, në mesin e të cilëve ka edhe shumë ish-të burgosur politikë”, tha Hyseni.

Kryeministri i Kosovës, Hashim Thaçi, ndërkaq i ka inkurajuar ish-të burgosurit politikë të Kosovës, që të aplikojnë për njohjen e statusit të të dënuarit, të burgosurit dhe të përndjekurit politik të Kosovës.

Me këtë rast, kryeministri Thaçi ka thënë se ndihet tepër i emocionuar dhe jashtëzakonisht krenar që është në mesin e njerëzve prijëtar të lëvizjes së Kosovës për liri dhe pavarësi, Adem Demaçin, Hydajet Hyseni, Ilmi Ramadani…etj.

“Nuk ka kënaqësi dhe krenari më të madhe sesa kur shteti kujdeset për njerëzit e sakrificës, të mundit, për njerëzit që gjithçka kanë pasur në potencialet e veta, e kanë shkrirë për atdheun e vet, për lirinë e vendit të vet”, ka thënë kryeministri Thaçi, duke shtuar se liria e Kosovës ka qenë ëndërr e të gjithëve dhe kjo ëndërr është shndërruar në realitet.

Kryeministri ka shprehur mirënjohje të thellë për kontributin, sakrificën e Adem Demaçit, i cili siç ka thënë ai, gjithmonë ka qenë simbol i udhëheqjes, mobilizimit, por edhe inspirimit për liri.

“Unë personalisht ndihem krenar që e kemi pasur simbol të rezistencës bacën Adem dhe të gjithë ju ish-të burgosur politikë, që keni qenë burim inspirimi në përpjekjet tona finalizuese politike dhe ushtarake për çlirimin e Kosovës dhe largimin e Serbisë nga Kosova”, theksoi kryeministri.