Në Zvicër arrestohet ish pjesëtari i UÇPMB-së nga Presheva

Nuhiu, bashkë me shtatëmbëdhjetë shqiptarët e tjerë nga Lugina e Preshevës janë të akuzuar si të ashtuquajtur "Grupi i Gjilanit"

Nën akuzën për krime lufte të ngritur nga prokuroria serbe kohë më parë ndaj 17 shqiptarëve, ish-luftëtarë nga Lugina e Preshevës, në një aksion të ndërmarrë  të forcave speciale të policisë zvicerane është arrestuar në Veve të kantonit Vaud të Zvicrës Shemsi Nuhiu, nga Presheva, ish-pjesëtar i UÇPMB-së. 

Nuhiu, bashkë me shtatëmbëdhjetë shqiptarët e tjerë nga Lugina e Preshevës janë të akuzuar si të ashtuquajtur “Grupi i Gjilanit” nga Gjykata për Krime Lufte në Beograd, për krime lufte, kinse të kryera ndaj serbëve, romëve dhe ndaj ndonjë shqiptari lojal, gjatë periudhës kohore mesi i qershorit dhe fundi i tetorit të vitit 1999.

Burimet nga Zvicra thonë se në kohën e arrestimit Nuhiu ishte në banesën e tij në Veve, ku jetonte me gruan dhe dy fëmijët e tij. Ndërkohë, autoritetet zvicerane nuk kanë bërë të ditur nëse ai do të ekstradohet në Serbi, apo do të ngritët procedura gjyqësore ndaj tij, në Zvicër.

Me gjithë interesimin e vazhdueshëm të familjarëve dhe përfaqësisë diplomatike të Republikës së Kosovës, nuk janë dhënë informata për Nuhiun se në cilën qendër të burgut mund të ndodhet i arrestuari, e as nëse do të ekstradohet në Serbi apo jo.

Ndryshe, në aksionin spektakular të xhandarmerisë serbe më 26 dhjetor të vitit 2008 ishte bastisur edhe shtëpia e Shemsi Nuhiut në Preshevë, ndërkohë që atëbotë në mungesë të Shemsiut, ishte arrestuar i vëllai i tij.