Barcelona rikthen vëmendjen te Fisnik Asllani, shqiptari sërish objektiv i katalanasve

Sulmuesi i Hoffenheimit është rikthyer në listën e dëshirave të Barcelonës, ndërsa interesim për të ka shfaqur edhe RB Leipzig

Sulmuesi me origjinë shqiptare, Fisnik Asllani, është rikthyer në radarët e Barcelonës, me gjigantin katalanas që po vazhdon kërkimet për një përforcim në repartin ofensiv, transmeton albinfo.ch. 

Paraqitjet bindëse të 23-vjeçarit me TSG Hoffenheim gjatë sezonit të kaluar kanë bërë që drejtuesit e klubit spanjoll ta konsiderojnë sërish si një alternativë serioze. Sipas raportimeve, Asllani vlerësohet si një sulmues që përshtatet me filozofinë e lojës së trajnerit Hansi Flick.

Barcelona fillimisht kishte fokusuar përpjekjet për transferimin e Julian Alvarez, por Atletico Madrid refuzoi të hynte në negociata për shitjen e lojtarit te një rival në La Liga.

Më pas, katalanasit tentuan të transferonin talentin francez Eli Junior Kroupi, duke paraqitur dy oferta për sulmuesin e Bournemouth, por të dyja u refuzuan.

Situata ndryshoi pas dëmtimit të Kroupit, i cili pritet t’i nënshtrohet një operacioni në këmbë dhe do të mungojë për një periudhë të gjatë. Kjo ka bërë që Barcelona ta rikthejë Asllanin në mesin e objektivave kryesorë për merkaton e verës.

Megjithatë, transferimi i tij nuk pritet të jetë i lehtë. Hoffenheim nuk është i gatshëm ta lëshojë lehtësisht sulmuesin, ndërsa interesim konkret ka shfaqur edhe RB Leipzig, që synon ta afrojë në radhët e veta.

Sipas raportimeve, Asllani e sheh me sy pozitiv një transferim te Barcelona, por mbetet të shihet nëse klubi katalanas do të arrijë ta fitojë garën për firmën e sulmuesit shqiptar./Albinfo.ch 

---